Елімізде ММА-мен қанша адам айналысады?

Қазақстанның ММА ұлттық құрама командасы Азияда 1-орынды және IMMAF-те 3-орынды иеленеді, деп хабарлайды Sport +.

Бұл туралы Мәжіліс депутаттарының сауалына Премьер-Министр Олжас Бектеновтің жауабында айтылған.

«Елімізде 2013 жылдан бастап ММА-ны ресми дамытуды аккредиттелген Қазақстандық ММА аралас жауынгерлік жекпе-жегі бойынша біріккен федерациясы (бұдан әрі – ММА федерациясы) жүзеге асырады. 2019 жылы спорт түрлерінің тізіміне «кәсіби ММА» спорт түрі енгізілді. Қазақстанда 4 халықаралық клуб (Alash Pride, ОCTAGON PROMOTION, Naiza Fighting Championship, Еркін күш) қызметін жүзеге асырады. Бұл клубтар жеке заңды тұлғалар саналады және жеке қаражат есебінен қаржыландырылады. Бүгінгі күні елімізде 23 мыңнан астам адам шұғылданатын 592 секция жұмыс істейді. Оларды даярлаумен 193 жаттықтырушы айналысады. Өңірлерде аккредиттелген ММА федерациялары қызмет атқарады. Сонымен қатар облыстық жоғары спорт шеберлігі және балалар-жасөспірімдер спорт мектептерінде 13 ММА бөлімшелері (Абай, Атырау, Алматы, Жамбыл, Батыс Қазақстан, Қарағанды, Солтүстік Қазақстан, Түркістан облыстары және Шымкент қ.) ашылды», - деді Олжас Бектенов жауабында.

Оның атап өтуінше, оқу-жаттығу жиындары, Қазақстан Республикасының чемпионаттары, кубоктары тұрақты түрде өткізіледі. Барлығы 94 спортшыдан құралған ұлттық құрама командалары (оның ішінде жасөспірімдер – 30 адам, жастар – 32 адам, ересектер – 32 адам) жыл сайын әлем және Азия чемпионаттарына қатысады.