Колби Ковингтон: Рахмоновты қысып, езіп тастаймын

Американдық файтер және UFC жартылай орта салмақтағы бұрынғы чемпиондық титулға үміткер Колби Ковингтон қазақстандық Шавкат Рахмонов туралы мәлімдеме жасады, деп хабарлайды Sport+.

Ковингтон егер октагонда Рахмоновпен кездессе, оны оңай жеңетініне сенімді.

«Мен оны қысып, езіп тастай аламын. Оған менің қысымым ұнамайды. Ол солақайлармен жақсы күресе алмайды. Біз оның Джефф Нилге қарсы қалай төбелескенін көрдік. Бұл бәсекелестікке толы кездесу болды. Ол әлі шыңдағы үміткерлермен жұдырықтаспады. Ол тек дивизиондағы бірнеше орта деңгейлі жігіттермен, ТОП-10 шегіндегі қарсыластармен кездесті. Бірақ ол мен сияқты чемпиондармен, бес раунд бойы оған қарсы шығатын, оны қыспаққа алатын жауынгерлермен кездеспеді. Мен оны жеңу оңай деп ойлаймын, бұл мен үшін тиімді жекпе-жек және болашақта өткізгім келетін шайқас. Желтоқсанда жеңсе де, жеңілсе де, бәрібір», — деді Колби Submission Radio-ға берген сұхбатында.