Микаэль Аскаров: Құрамадағы атмосфера барлық клубта кездесе бермейді
Қазақстан жастар құрамасының қорғаушысы Микаэль Аскаров Sport Plus Qazaqstan сайтына берген сұхбатында Беларусь чемпионаты, «Қайрат» клубы, Бірінші лига және жастар құрамасындағы матчтары туралы айтып берді.
– Микаэль, қалайсыз? Қазіргі уақытта өміріңізде қандай жаңалықтар болып жатыр?
– Барлығы жақсы. Қазір «Витебскке» қарсы ойынға дайындалып жатырмыз. Чемпионаттың аяқталуына тоғыз тур қалды, маусымды жоғары орынмен аяқтағымыз келеді.
– Қазіргі таңда сіз «Сморгонь» клубында ойнап жатырсыз. Клубтың маусым соңына дейінгі басты мақсаты қандай?
– Негізгі мақсат — қалған тоғыз турда мүмкіндігінше көп ұпай жинау.
– Өткен жылы сіз «Қайрат» клубымен келісімшартқа қол қойдыңыз, бірақ бірде-бір матч өткізбей, командадан кеттіңіз. Мұндай нәтижені күткен бе едіңіз?
– «Қайратпен» келісімшартқа кешірек қол қойдым, сондықтан біз бірден жалға кетуге келістік. Осылайша мен «Екібастұз» клубына барып, ойын тәжірибесін жинап, қазақстандық футболмен танысуға мүмкіндік алдым. Бір жылдан кейін «Қайратқа» оралдым, бірақ бас бапкермен біздің көзқарасымыз сәйкес келмеді, сол себепті өзара келісіммен қоштастық. Мен жалға қайта кетуіме болар еді, бірақ сол кезде хабарласқан клубтар мені еркін агент болғанымды қалады. Мен «Қайратқа» ризамын, себебі олар менің жағдайымды түсініп, мені босатты. Клубтағы адамдармен әлі де байланыстамын, олар мен үшін жат емес.
– «Қайрат» сізді «Екібастұз» клубына жалға жіберді. Бұл сізге қызығушылық танытқан жалғыз клуб болды ма?
– Басқа да нұсқалар болды, бірақ агентім және отбасыммен ақылдаса отырып, «Екібастұзға» көшуге шешім қабылдадым. Маған тәжірибелі футболшылар арасында ойнау керек болды. «Фенербахче» сапында менде көп тәжірибе болды, бірақ құжат мәселесіне байланысты негізгі команда үшін ресми матчтарға қатыса алмадым. Маған ересектер арасында ойын тәжірибесін жинап, статистикамды жақсарту қажет болды. Сол кезде менде КПЛ, Бірінші лига, сондай-ақ Армения мен Беларусь клубтарынан ұсыныстар болды, бірақ тұрақты ойын тәжірибесі үшін «Екібастұзды» таңдадым.
– Беларусь Жоғарғы лигасы мен Қазақстан Бірінші лигасын салыстыра аласыз ба?
– Егер Беларусь Жоғарғы лигасы мен Қазақстан Бірінші лигасын салыстырсақ, әрине, үлкен айырмашылық бар. Беларусьтегі инфрақұрылым мен футбол деңгейі айтарлықтай жоғары.
– Келісімшарт аяқталған соң Қазақстанға оралуды немесе шетелде қалуды жоспарлайсыз ба?
– Келісімшарт аяқталғаннан кейін не болатынын нақты айта алмаймын, футболда бәрі болуы мүмкін.
– Жақында Қазақстан жастар құрамасы Мальта мен Бельгияға қарсы ойындар өткізді. Бұл ресми матчтардағы алғашқы тәжірибеңіз, қандай әсер алдыңыз?
– Маған сенім артқаны үшін бапкерлік штабқа өте ризамын. Мальтаға қарсы ойында Иван Свиридовқа нәтижелі пас бердім. Жиын кезінде көп жаңа нәрсені үйрендім. Жастар құрамасындағы атмосфера керемет, мұндай жағдай барлық клубта кездесе бермейді. Жаңа шақыртуды асыға күтемін. Өкінішке қарай, Испанияға виза жасатып үлгермедім, бірақ Алматыдағы үйдегі ойынға шақырту аламын деп үміттенемін. Алматы мен үшін жақын қала, онда мені қолдайтын достарым мен таныстарым көп. Бапкерлік штабтың мені тағы да шақыратынына үлкен үміт артамын.
