Премьер-лига: «Қайрат» бірінші орынға көтерілді

Футболдан Премьер-лига командалары арасындағы ел біріншілігінің 21-турының алғашқы ойын күні өтті, деп хабарлайды Sport Plus Qazaqstan.

Бұл күні Алматының «Қайраты» өз алаңында Қызылорданың «Қайсарын» қабылдады. 

Алматылық клуб соңғы екі турда жеңіске жете алмай келеді. Алдымен Қостанайдың «Тобылымен» 2:2 есебімен тең түссе, одан кейін елордалық «Астанаға» 0:1 есебімен жол берді.

Биыл жүлделі орынның біріне ие болуды алдына мақсат еткен «Қайрат» үшін бүгінгі кездесуде үш ұпай олжалау маңызды еді. Оған қоса аталған қарсыласына алғашқы айналымда 0:1 есебімен есе жіберген еді.

Кездесу барысында алматылық футболшылар тізгінді өз қолына алуға тырысты. Соған қарамастан бірінші кезеңде таблодағы есепке өзгеріс енген жоқ. 

«Қайрат» сапынан Георги Зариа 86-минутта соққан жалғыз гол ойын тағдырын шешті. Алматылық клуб қарсыласынан 1:0 есебімен басым түсіп, турнир кестесінде бірінші орынға көтерілді.