Көшпенділер ойындары: Әлемнің 35 елінен келетін садақшылар қазақстандық өнімді пайдаланады
Астанада өтетін V Дүниежүзілік көшпенділер ойындарына санаулы күн қалды, деп хабарлайды Sport Plus Qazaqstan.
Бүгінгі таңда ұлттық құрама спортшыларшылары анықталып, қатысушылардың барлығы дерлік дүбірлі додаға сақадай сай.
Дәстүрлі садақ атудан ұлттық құрама бас бапкері Диас Ахметовтің айтуынша, садақ ату спорт түрі бойынша елімізге 35 мемлекеттен 200-ден аса спортшы келеді.
«Біздің садақ атушыларға Түркия, Қырғыстан, Моңғолияның мергендері бәсеке тудырары анық. Франция, Италия, Испания, Қытай, Тайланд, Ираннан келетін спортшылар да өте мықты. Дегенмен, біздің спортшылар да осал емес. Жүлдеден үміттіміз», - дейді бас бапкер Диас Ахметов.
Ойынға халықаралық стандарттарға сай жасалған 2000-нан аса оқ дайындалған.
«Осы уақытқа дейін ұлттық құрама құрал-жабдықтардың басым бөлігін Түркия, Мажарстан, Ресейден тапсырыс беріп алдыртатын. Кейінгі жылдары еліміздегі өндіріс те жолға қойыла бастады. Алдағы Көшпенділер ойынына отандық өнім «Алтын жебе» атты цехтың шығарған оқтарын қолданамыз. Сол үшін халықаралық стандарттарға сай жасалған 2000-нан аса оқ дайындап қойдық», - дейді дәстүрлі садақ атудан ұлттық құрама мүшесі Ербол Тапенов.
