Георгий Кичигиннің келесі жекпе-жегі белгілі болды

Қазақстандық жартылай орта салмақтағы жауынгер Георгий Кичигин 8 қыркүйекте Краснодарда өтетін АСА 179 турнирінде жекпе-жекке шығады, деп хабарлайды Sport Plus Qazaqstan.

Кичигиннің қарсыласы ресейлік Андрей Кошкин атанады. Кичигин 2024 жылдың сәуірінде Денис Изомеденовті төрешілердің шешімімен жеңіп, АСА лигасына қайта оралды.

Ресейлік жауынгер Кошкин желтоқсан айында жеңіл салмақтағы гран-приде Артем Резниковпен жекпе-жек өткізіп, оған ұтылған болатын.

Сондай-ақ, аталмыш турнир аясында АСА титулына бұрынғы үміткер Евгений Егембердиев октогонға оралады.

Турнирді тікелей эфирде Sport Plus Qazaqstan телеарнасынан, сондай-ақ sportplustv.kz сайтынан көруге болады.