Елена Рыбакина жаңа бапкерін көрсетті

Қазақстанның бірінші, әлемнің 6-ракеткасы Елена Рыбакина Дубайда (БАӘ) жаттығып жатыр, деп хабарлайды Sport+ Kazinform сайтына сілтеме жасай отырып. 

Физиотерапевт Стефан Дюэль Instagram әлеуметтік желісінде фотосуретті жариялады. Онда Елена Рыбакина өз командасымен бірге бейнеленген. Оның ішінде хорватиялық бапкер Горан Иванишевич те бар.

Қазақстандық теннисші бес жыл бойы хорватиялық Стефано Вуковпен бірге жаттығып, онымен қарым-қатынасты биылғы тамыз айында үзген болатын. Кейін осыған дейін сербиялық, «Үлкен дулыға» турнирінің 24 дүркін чемпионы Новак Джоковичті жаттықтырған Г.Иванишевичпен келісімге келген еді. 

Елена Рыбакина алдағы жылы 12-26 қаңтар аралығында өтетін Аустралия ашық чемпионатында табысты өнер көрсетуге бел байлап отыр. Қазақстандық теннисші 29 желтоқсан – 5 қаңтарда болатын Брисбен (Аустралия) WTA 500 турниріне бұл жолы қатыспайды. Өткен маусымда осы жарыста Е.Рыбакина чемпион атанған еді.