«Атлетико» 2006 жылдан бері алғаш рет «Барселонаны» сырт алаңда жеңді

21-22 желтоқсанға қараған түні Испания Ла Лигасының 18-турындағы матчта каталондық «Барселона» мен мадридтік «Атлетико» кездесіп, ойын нәтижесі қонақтардың пайдасына аяқталды, деп хабарлайды Sport+.

Қызыл-ақ түстілер 2:1 есебімен жеңіске жетіп, соңғы голды қосымша уақыттың соңында соқты. Осылайша, «Атлетико» 2006 жылдың ақпан айынан бері алғаш рет «Барселонаны» сырт алаңда тізе бүктірді.

Бұл жеңіссіз серия 24 матчқа созылған еді. Соңғы рет мадридтіктер «Камп Ноуда» 2005/2006 маусымының ақпан айында 3:1 есебімен жеңіске жеткен болатын.

Айта кетейік, «Атлетико» 18 матчта 41 ұпай жинап, Ла Лига турнирлік кестесінің көшін бастады. «Барселона» 38 ұпаймен екінші орында, бірақ олар «Атлетикодан» бір матчқа артық ойнаған. Ал 17 матч өткізген мадридтік «Реал» 37 ұпаймен үшінші орынға жайғасты.