«Реал Мадрид» су тасқынынан зардап шеккендерге ірі көлемде көмек көрсетті

Мадридтік «Реал» футбол клубы Испанияда су тасқынынан зардап шеккендерге 1 млн еуро көлемінде қайырымдылық көмек жасады, деп хабарлайды Sport+.

Испанияның Валенсия провинциясында жақында қатты жаңбыр жауып, «Дана» дауылы салдарынан ауқымды су тасқындары болды.

100-ден астам адам қаза тауып, кейбір аудандар су басқан жолдар кесірінен оқшауланып қалды. Электр қуаты мен байланыс үзіліп, көпірлер қирады.

Испания Корольдік футбол федерациясы Ла Лига мен Сегундадағы бес матчты, соның ішінде 2 қарашада өтуі тиіс болған «Валенсия» мен «Реал» арасындағы ойынды кейінге қалдырды.

«Реал» сондай-ақ Қызыл Крестпен бірлесе отырып, зардап шеккендерге арналған қаражат жинауды бастайтынын жариялады.