АСА белбеуін жеңіп, UFC-ге бет бұруды мақсат қойдым: Бағдос Олжабай
АСА лигасының қазақстандық жауынгері Бағдос Олжабай Sport Plus Qazaqstan телеарнасына өзінің ресейлік лигадағы келесі жекпе-жегі және UFC-ге өту мақсаты туралы айтып берді.
«Қарсылас белгісіз, бірақ келесі жекпе-жек шілде айына жоспарланған. Мен байқағандай, АСА лигасында жекпе-жектер өте тартысты өтеді. Ол жақта берген қарсыласты қабылдап, төбелесесін, таңдауға мүмкіндік жоқ. Негізі шетелдік лигалардың деңгейі бөлек, АСА лигасында жоғары деңгейді сезген соң, сенің денең өзі төбелеседі. Шаршағанды сезбейсің. АСА лигасында келесі жекпе-жекте жеңіп, мен үздіктер қатарына кіре аламын. Құдай қаласа АСА белбеуін жеңіп, UFC-ге бет бұруды мақсат қойып отырмын. Бір қызығы, АСА-да чемпион болған жауынгерлер 1-2 жылың ішінде UFC-де топ жарып, белбеуге таласып жатыр. Мен Асу Алмабаев пен Азат Мақсұммен бірге жаттығамын. Олар маған «UFC-де деңгейі сенен төмен жауынгерлар бар, сен ол жақта өзіңді көрсете аласың» деп айтқан», - деді Олжабай.
