Ардақ Сәулет Әлиевтің секіру жаттығулары туралы: Шынымен, бұл жайлы аңыздар көп

Елордалық «Жеңіс» қорғаушысы Ардақ Сәулет Sport+ телеарнасындағы «Футбол плюс» Қазақстан құрамасының қазіргі бас бапкері Әли Әлиевтің секіру жұмысына қатысты әдістері туралы айтты. Ардақ бұған дейін Әлиевпен бірге «Қызылжарда» жұмыс істеген.

«Әли Ханалиевичтің жүктеме беретін шарықтау күні — ойынға 3-4 күн қалғанда. Ол екі жаттығу өткізеді: таңертең футболшылар 50-ден астам рет тумбаға, кедергілерге секіреді. Шынымен, бұл туралы аңыздар таралып үлгерді — бәрі ұйықтап жатқанда, біз таңғы 9-10-да тумбалардың үстінде тұрамыз.  

«Қызылжарға» келген жігіттердің көбі физикалық тұрғыдан мықтырақ болып кететінін айтатын. Себебі секіру жұмысы жарылғыш күшті дамытады. Иә, көпшілігі шаршайды, шағымданады, бірақ бізге нақты сандарды көрсетіп, түсіндіреді. Бізде матч барысында қарсыластарға қарағанда 1,5-2 есе көп жеделдеу тіркеледі. Сондықтан көрсеткіштерді көрген соң, ары қарай жаттығуды ойланбай жалғастырасың»  

— Қалай ойлайсың, Түркияда құрама футболшылары дәл осы секіру жұмыстарын жасап жүр ме?  

— Жігіттер видеолар жібереді, таңғы 8-9-да физикалық дайындық бапкерлері тумбаны көтеріп, алаңға қарай кетіп бара жатады.

«Футбол плюс» бағдарламасының толық шығарылымын төмендегі плеер арқылы тамашалай аласыздар.