Алмат Бекбаев Сейсеннің дебюті туралы: Оған өзін мықты құрамаларға қарсы ойындарда көрсету қажет

Футболдан Қазақстан құрамасының бұрынғы қақпашысы Алмат Бекбаев Мұхамеджан Сейсеннің Лихтенштейнге қарсы өткен ойындағы (2:0) дебютін бағалады, деп хабарлайды Sport+ Sports24.kz сайтына сілтеме жасап.

Айта кетейік, бұл Сейсеннің ұлттық құрама сапындағы алғашқы ресми матчы болды. Бұған дейін ол тек 2021 жылы Солтүстік Македонияға қарсы өткен жолдастық кездесуге қатысқан еді.

«Дебютті сәтті өтті деп айтуға болады, өйткені Мұхамеджан «құрғақ» матч өткізді. Кез келген қақпашы құраманың жейдесін алғаш кигенде осындай ойынды армандайды. Лихтенштейнге қарсы ойнаса да, қақпасына гол жібермеуі — оның сенімділігі үшін үлкен плюс.

Сейсенге өзін мықты құрамаларға қарсы ойындарда көрсету қажет, ал оның болашағы қалай өрбитінін тек уақыт көрсетеді. Менің ойымша, Лихтенштейнге қарсы шыққан құрам 2026 жылғы әлем чемпионатына іріктеуде негізгі рөл атқарады», — деді Бекбаев.

Іріктеу кезеңінің алғашқы екі турында Қазақстан құрамасы Уэльс пен Лихтенштейнге қарсы ойнап, тек соңғысына қарсы жеңіске жетті.

J тобында Қазақстан, Уэльс және Лихтенштейннен бөлек, Бельгия және Солтүстік Македония құрамалары да бар.