Әли Әлиев: Ең бастысы – біз Еуропа аренасында жеңіске жеттік

Қазақстан құрамасының бас бапкерінің міндетін атқарушы Әли Әлиев Лихтенштейн құрамасына қарсы өткен матчтың (2:0) қорытындысына пікір білдірді, деп хабарлайды Sport+ Қазақстан футбол федерациясына сілтеме жасап.

— Баршаңызға қолдау көрсеткендеріңіз үшін алғыс айтамын. Бізді жанкүйерлер, БАҚ, федерация әр түрлі жағынан қолдады. Әсіресе, ойыншыларға қысым көрсетпей, байсалды ұстаным танытқан журналистерге ерекше алғыс білдіремін. Бұл — ортақ жеңіс. Қарсылас кім болғаны маңызды емес, ең бастысы — біз Еуропа аренасында жеңіске жеттік. Біз Лихтенштейн құрамасын жақсы зерттедік, олардың алаңды бізге беретінін түсіндік, және осы мүмкіндікті пайдалануға тырыстық.  

Қарсыласты бағаламау қаупі болды, және ойынның басы расында біраз жүйке сыр бергендей болды. Біздің ойыншылар қарсылас толық қорғанысқа жүгінгенде және екінші нөмірмен ойнағанда жиі тап бола бермейді. Бірінші таймда екі гол соғып, стандартты жағдайларды тиімді пайдаланғанымызға қуаныштымын. Жұмысымызды жалғастырамыз, алда қиын жол күтіп тұр. Жігіттер мұндай матчтардың сирек болатынын түсінуі керек. Енді мүлде басқа деңгейдегі қарсыластарға дайындалу қажет.