Швейцариялық қақпашы Чемпиондар Лигасында «құрғақ» матчтар бойынша рекорд орнатты

Миландық «Интер» және Швейцария құрамасының қақпашысы Ян Зоммер Чемпиондар Лигасында бір клуб үшін өткізген «құрғақ» матчтар бойынша рекорд орнатты, деп хабарлайды Sport+.

35 жастағы швейцариялық қақпашы «Интер» құрамында өткізген ойындардың 73%-ында (11 матчтың 8-інде) қақпасына бірде-бір гол жібермеген. Бұл көрсеткіш Чемпиондар Лигасы тарихында бір клуб үшін кем дегенде 10 матч өткізген барлық қақпашылар арасындағы ең үздік нәтиже.

Сонымен қатар, Зоммер «Интер» үшін Чемпиондар Лигасында 39 сейв жасап, тек төрт гол ғана жіберіп алған. Қазіргі маусымда ол төрт ойынның бәрінде қақпасын голдан аман сақтады.

Одан бөлек, тағы бір қақпашы - «Аталанта» клубының негізгі ойыншысы Марко Карнесекки де топтық кезеңнің алғашқы төрт матчында бірде-бір гол жібермеген итальяндық қақпашы болып табылады.

Өткен төртінші турда «Интер» лондондық «Арсеналды» 1:0 есебімен жеңді, ал «Аталанта» сырт алаңда немістің «Штутгартын» 2:0 есебімен ұтты.