Елена Рыбакинаның Australian Open-2025 турниріндегі алғашқы қарсыласы белгілі болды

Мельбурнда 2025 жылғы Австралия ашық чемпионатының әйелдер арасындағы жеке жарысының жеребесі тартылды. Қазақстанның бірінші ракеткасы Елена Рыбакина жарыстағы жолын бірінші айналымнан бастайды, деп хабарлайды Sport+.

Оның алғашқы қарсыласы – 16 жастағы австралиялық Эмерсон Джонс. Әлемдік рейтингте 371-орында тұрған жас теннисші Australian Open-2025 турниріне арнайы шақырту (wild-card) алған. Бұл екі спортшының корттағы алғашқы кездесуі болмақ.

Australian Open-2025 турнирінің негізгі кезеңі 12-26 қаңтар аралығында өтеді. Әйелдер арасындағы жеке разрядтың қазіргі чемпиондық атағы беларусьтық Арина Соболенкоға тиесілі.

Айта кетейік, өткен жылы Елена Рыбакина Австралия ашық чемпионатының екінші айналымында күтпеген жерден ресейлік Анна Блинковаға есе жіберіп, турнирден шығып қалған еді.