Боксшы Асланбек Шымбергеновті жамбылдық жанкүйерлер күтіп алды
Париж Олимпиадасының қатысушысы Асланбек Шымбергеновті жамбылдық жанкүйерлер күтіп алды, деп хабарлайды Sport Plus Qazaqstan.
Боксшы Асланбек Шымбергеновті әуежайдан Жамбыл облыстық спорт басқармасының өкілдері, спортшының жақындары мен жанкүйерлері күтіп алды. Жамбылдық жанкүйерлердің тарапынан қазақстандық боксшыға ерекше құрмет көрсетілді.
Жиналған көпшілік былғары қолғап шебері Асланбек Шымбергеновтің болашақта талай биік белестерді бағындыратынына сенім білдіріп, қолдау көрсетті. Сондай-ақ Асланбек Шымбергенов те өзін қолдаған жанкүйерлер алғысын жаудырды.
Айта кетейік, боксшы 28 шілдеде өткен алғашқы жекпе-жегінде иорданиялық Зейяд Ишаиштан жеңіліс тапқан болатын. Франция астанасы Париждегі жазғы Олимпиада ойындары 11 тамызға дейін жалғасады.
