Бейбіт Жұқаев Астанадағы жеңісі мен жарақаттан кейінгі жағдайы туралы айтты

Қазақстандық теннисші Бейбіт Жұқаев Астанада дәстүрлі «Президент Кубогы» аясында өтіп жатқан ATP Challenger 50 санатындағы турнирді сәтті бастады. Бірінші айналымда ол отандасы Әмір Омархановпен кездесіп, екі сетте 6:4, 6:4 есебімен жеңіске жетті. Бұл Жұқаев үшін жарақатына байланысты төрт айға жуық үзілістен кейінгі кәсіпқой турнирдегі алғашқы матч болды. Кездесуден кейін Бейбіт қазіргі жағдайы, ұзаққа созылған оңалту кезеңі және алдағы матчтан не күтетінін айтып берді.

— Бейбіт, төрт айға жуық үзілістен кейін кортқа қайта оралдың. Алғашқы ресми матчтан кейінгі әсерің қандай?

— Расында да, көптен бері ойнаған жоқпын, сондықтан бүгін оңай болған жоқ. Оның үстіне матч күндіз өтті, күн өте ыстық әрі жел де болды. Тағы бір қиындық — Еуропадан кеше кешке ғана ұшып келдім. Шамамен түнгі 11-де жеттім. Жолдан кейін тынышталып, ұйықтағанша біраз уақыт кетті, ал таңғы сегізде жаттығуға шығу керек болды.

Оған дейін Еуропада топырақ төсеніште клубтық матчтар өткіздім. Сондықтан мұнда басқа төсеніш пен жағдайға бірден бейімделу қажет болды. Әрине, мұның бәрі ойынға әсер етті. Дегенмен ең бастысы — кортқа шығып, жеңіске жете алғаныма қуаныштымын.
— Бірінші айналымда бірден Әмір Омархановпен «қазақстандық дербиде» кездестің. Бұл матч қаншалықты қиын болды?

— Матч оңай болған жоқ. Әсіресе Әмір екеуміз бұған дейін турнирлерде бір-бірімізге қарсы ойнап көрмеген едік. Бірге жаттыққан кездеріміз болды, бірақ ресми матч мүлде бөлек. Сондықтан оның ойынынан не күту керектігін толық түсіне алмадым.

Оның үстіне матч алдында турнирден бас тарту туралы да ойладым, өйткені жарақатым әлі толық жазылған жоқ. Жүз пайыз дайын болмасам, кортқа шыққым келмейді. Себебі әр матчта бар күшімді салып ойнауға тырысамын. Бірақ бұл жолы өзімді сынап көруге шешім қабылдадым. Кездесу барысында аяғымның қатты мазаламағанын сезіп, күресті жалғастырдым. Нәтижесінде жеңіске жеткеніме қуаныштымын.
— Жарақатың туралы толығырақ айтып берші. Неліктен оңалту кезеңі ұзаққа созылды және қазір өзіңді қалай сезініп жүрсің?

— Барлығы мамыр айының басында болды. Азиядағы бірнеше турнирден кейін Алматыға оралған едім. Баспалдақтан түсіп келе жатып, аяғымды сәтсіз жарақаттап алдым. Алғашқы бір жарым айда оң аяғыма дұрыс тұра алмадым. Соның салдарынан денеде тепе-теңдік бұзылып, толыққанды жаттығу жасау мүмкін болмады.

Біртіндеп қалпыма келе бастадым. Соңғы бір жарым айда жалпы дене дайындығына кірістім: жаттығу залында күшімді қалпына келтіру үшін жұмыс істедім, төзімділікті арттыру үшін велосипед тептім. Ал теннис жаттығуларына екі-үш апта бұрын ғана оралдым. Алматыда топырақ төсеніште ойнай бастадым. Сондықтан қазір де жағдайымды бақылап, біртіндеп бұрынғы қалпыма келіп жатырмын.
— Бірінші сеттің басында ойынға кірісу үшін саған біраз уақыт қажет болғаны байқалды. Бұған не себеп болды?

— Басында жағдайға бірден бейімделу шынымен қиын болды. Жаңа доптар берілген кезде ойнау сәл жеңілдей түсті. Мұнда доптар төрт-бес геймнен кейін жұмсарып кетеді, соның әсерінен ойынның сипаты өзгереді және оған да бейімделу керек.

Бірінші сетте допты ойынға жақсы қостым, тіпті екінші сетке қарағанда жақсырақ болды. Маңызды сәттерде сервисім көп көмектесті және басымдығымды сақтап қалуға мүмкіндік берді.
— Екінші сетте өзіңді әлдеқайда сенімді сезінгенің байқалды. Матч барысында не өзгерді?

— Менің ойымша, сол уақытқа қарай жағдайға бейімделіп, жақсылап қызындым және өзімді сенімдірек сезіне бастадым. Өз ойыныма деген сенімім де артты. Соның арқасында ойнау жеңілдей түсті. Нәтижесінде матчты жеңіспен аяқтай алдым.
— Келесі айналымда тағы бір матч күтіп тұр. Жақында алған жарақатыңды ескерсек, алдағы кездесуге қандай көңіл-күймен шығасың?

— Ең алдымен өз жағдайыма қараймын. Қазір мен үшін аяғымның бүгінгі матчтан кейін қалай қалпына келетінін және ертең өзімді қалай сезінетінімді түсіну маңызды. Егер бәрі жақсы болса, әрине, кортқа шығып, жеңіс үшін күресемін. Соңғы шешімді өз жағдайыма қарай қабылдаймын.
Барлық маңызды спорттық оқиғаларды BeeTV-ден тамашала!