Жұман Жұмабеков Айжигит Еркебайұлымен реванш туралы: Егер осы жекпе-жекті қаласаң, менің шарттарым бойынша – кеттік!

Қазақстандық спортшы Жұман Жұмабеков NAIZA.TV эфирінде қырғыз Айжигит Еркебайұлының шақыруына жауап берді, деп хабарлайды Sport+.

«Егер Айжигит бұл жекпе-жекті шынымен қаласа, мен оған өз шарттарымды айттым — 65 келі. Ол менің Расул Мирзаевпен 70 келі салмақта айқасқанымды алға тартады, бірақ Расул мен Айжигитті салыстыруға келе ме? Расулға деген құрметім үшін сол салмақта келісім бердім, себебі ол артық салмақ қумаса да болады. Ол бұған лайық.  

Айжигиттің ең қатты айқасы менімен болды, базар жоқ, мен жеңілдім. Бірақ егер мен реваншты сұраған болсам, әңгіме басқа. Менің NOMAD-та рекордым 6-0, бұрынғы лига чемпионымын. Сондықтан өз талабымды қойдым — 65 келі. Егер осы жекпе-жекті қаласаңдар, менің шарттарыммен — кеттік!», — деді Жұмабеков. 

Айжигит Еркебайұлы стористе Жұманды 9 мамыр күні NOMAD-та реванш өткізуге шақырды.  

Олардың алғашқы айқасы NAIZA-да өткен болатын, онда Жұман чемпиондық белбеу үшін жекпе-жекте нокаутпен жеңілген.