Волейболдан Қазақстан құрамасы Филиппиндегі турнирдің жартылай финалына шықты

Филиппинде әйелдер командалары арасында волейболдан өтіп жатқан «AVC шақыру кубогі» турнирінде Қазақстан құрамасы жартылай финалға шықты, деп хабарлайды Sport Plus Qazaqstan.

Ришат Гилязутдиновтің шәкірттері В тобындағы соңғы ойынын Гонконг құрамасымен өткізді.

Бұдан бұрын Вьетнамға 1:3 есебімен есе жіберген қазақстандықтарға жартылай финалға шығу үшін жеңіс ауадай қажет еді.

Қазақстан құрамасының капитаны, Орал волейболының түлегі Сана Анарқұлова бастаған қазақстандықтар жанкүйерлерін жерге қаратпай, 3:0 (25:17, 25:18, 25:4) есебімен жеңіске жетті.

Қазақстан финалға шығу үшін Филиппин құрамасымен шеберлік таластырады.

Аталмыш турнир чемпионы «Сегіздік финалына» жолдама алады. Онда Ұлттар лигасының бір ғана жолдамасы сарапқа салынады.