Уимблдон: Путинцева олимпиада чемпионын ұтып, үшінші айналымға шықты

Қазақстанның екінші, әлемнің 35-ракеткасы Юлия Путинцева Уимблдон турнирінің үшінші айналымына шықты, деп хабарлайды Sport Plus Qazaqstan.

Қазақстандық теннисші екінші кездесуін дүниежүзілік рейтингіде өзінен бір саты төмен тұрған чехиялық Катержина Синяковамен өткізді.

К.Синякова – жұптық сында әлемдік рейтингіде көш бастап, Токио олимпиадасының чемпионы атанған спортшы.

Бірінші партияда Путинцева қарсыласына еш мүмкіндік берген жоқ – 6:0. Екіншісінде есеп 4:4 болған мезетте Синякова брейк жасап кетті – 6:4.

Үшінші, шешуші сетте Юлия 3:0 есебімен алға кетті. Содан кейін матчты тағы бір брейкпен түйіндеді – 6:2. Бір сағат 38 минутқа созылған бәсеке барысында Путинцева 1 эйспен бірге 7 брейк-пойнттың бесеуін құр жіберген жоқ. Синякова 1 эйс, 1 брейкпен (7 брейк-пойнт) шектелді.

Юлия Путинцева төртінші айналымға шығу үшін әлемнің 1-ракеткасы, Польша өкілі Ига Швентек немесе рейтингіде 85-сатыдағы хорватиялық Петра Мартичтің қай жеңгенімен шеберлік таластырады. 

Қазақстандық теннисші қазіргі кезде WTA Live рейтингісінде 30-орынға көтеріліп тұр.