Sport Plus Qazaqstan телеарнасы УЕФА Конференция лигасында «Астана» және «Тобыл» матчтарын тікелей эфирде көрсетеді

25 шілдеде Sport Plus Qazaqstan телеарнасы УЕФА Конференция лигасының іріктеу кезеңінде «Астана» және «Тобыл» қазақстандық футбол клубтарының матчтарын тікелей эфирде көрсетеді.

Қос қазақстандық команда да еурокубоктың екінші іріктеу кезеңінің алғашқы матчтарын өткізеді.

Бірінші ойынның трансляциясы Қазақстандық уақыт бойынша сағат 21:00–де басталады. Аталмыш кездесуде Кишинев қаласында «Астана» молдавиялық «Милсамиге» қарсы ойнайды. Григорий Бабаян шәкірттері еурокубоктық доданың бірінші кезеңіне қатыспады.

Қазақстандық уақыт бойынша сағат 23:00–де Швейцарияда жергілікті «Санкт Галлен» мен қостанайлық «Тобыл» арасындағы матч басталады. Швейцариялық команда да іріктеудің бірінші кезеңіне қатыспады. Ал қостанайлықтар жорықты Еуропа Лигасының іріктеуінде бастап, онда екі ойын сомасы бойынша словакиялық «Ружембероктан» (2:5, 1:0) ұтылып, Конференциялар лигасына төмендеп қалды.

Қос матчты Sport Plus Qazaqstan телеарнасының эфирінде, sportplustv.kz сайтында және Sport Plus Qazaqstan Youtube-арнасында тамашалауға болады.