Қазақ балуандары әлемдік рейтингте

Халықаралық күрес федерациясы United World Wrestling 2023 жылдың қорытындысы бойынша әлемдік рейтингті жариялады. Үш күрес түрінен 16 қазақстандық балуан Топ-10 тізіміне енген. Ал, қос спортшымыз өз салмақ дәрежелерінде көш бастап тұр.

Әйелдер күресінен Жәмиля Бақбергенова 72 келіде 53 000 ұпай жинап, үздік атанды. Сонымен қатар, өз салмақтарында Марина Седнева 9 орында (55 кг),Диана Каюмова 8 орында (59 кг).

Еркін күресте де үздіктер қатарына енгендер аз емес. Қазақтан шыққан тұңғыш әлем чемпионы Ризабек Айтмұхан 92 келі салмақ дәрежесінде көш бастап тұр. Оның еншісінде 62 200 ұпай. 74 келіде Дархан Есенғали алтыншы және Нұрқожа Қайпанов тоғызыншы орында, 79 келіде Болат Сақаев төртінші, ал Азамат Дәулетбеков 86 келіде екінші сатыда. Мейрамбек Қартбай (57 кг) және Өсімжан Дастанбек (61 кг) өз салмақтарында тоғызыншы орында. Аса ауыр салмақта Юсуп Батырмырзаев Топ-7 түйіндеп тұр. 

Грек-рим күресінен ең жоғары нәтиже Нұрсұлтан Тұрсыновта. Ол 87 келі салмақ дәрежесінде 55 520 ұпаймен әлемдік рейтингте төртінші орында. 55 келіде қос балуанымыз: Марлан Мұқашев бесінші, Аманғали Бекболатов 9-орында. Мұхамедәлі Мамырбек (63 кг) алтыншы, Демеу Жадыраев (77 кг) жетінші сатыда.

Олимпиадалық жылдың басталуына байланысты бірнеше балуан басқа салмақ дәрежесіне ауысатынын хабарлаған еді. Қазақстандағы күрес рейтингін ақпан айында Астанада өтетін ел чемпионатынан көреміз.