Денис Евсеев Қытайдағы жарыстың ширек финалына өтті

Қазақстандық, әлемнің 184-ракеткасы Денис Евсеев Шэньчжэнь (Қытай) челленджер турнирінің ширек финалына өтті, деп хабарлайды Sport Plus Qazaqstan.

Жарыстың 6-ракеткасы Денис Евсеев екінші айналымда әлемнің 262-ракеткасы, аустралиялық Филип Секуличпен кортқа шықты.

Тартысты өрбіген бірінші партияда Евсеев тай-брейкте сәтті ойнады – 7:6 (7:3). Екінші сет оған оңайлау тиді – 6:3.

Бір сағат 40 минутқа созылған бәсеке барысында Денис 8 эйспен бірге 7 брейк-пойнттың екеуін өз есебіне жазды. Секулич 3 эйс, 1 брейктен аса алмады.

Денис Евсеев жартылай финалға шығу үшін әлемнің 223-ракеткасы, эстониялық Марк Лаял немесе рейтингіде 253-сатыдағы ұлыбританиялық Артур Феридің қай жеңгенімен таласады.

Д.Евсеев ATP Live рейтингісінде 171-орынға көтеріліп тұр.