Бұл жерден чемпион шығады: Batyr Bolamyn қоры Алматы облысындағы ауыл балаларын тағы бір спорт кешенімен қуантты
Алматы облысының Асқар Тоқпанов ауылында балаларға арналған спорт кешенінің тағы бір ашылу салтанаты өтті, деп хабарлайды Sport Plus Qazaqstan.
«Қазақстан халқына» қорының демеушілігі және серіктестігімен жұмыс істеп жатқан қор шалғай аймақта осымен 40-тан аса спорт залдарын ашып үлгерді.
«Batyr Bolamyn» қорының қолдауының арқасында ауыл-аймақтағы көп балалы отбасылар мен халықтың әлеуметтік осал топтарынан шыққан балалар бокс, қазақша күрес, баскетбол, дзюдо, үлкен теннис, үстел теннисі, тоғызқұмалақ, шахмат және т. б. спорт секцияларына тегін қатыса алады.
Қор бұл жолы еркін күрестен әлем чемпионатының бірнеше дүркін және Азия чемпионатының жеті дүркін жүлдегері, қазақстандық палуан Дәулет Ниязбековтың бастамасына қолдау білдірді.
Атап айтқанда палуан бүгінде шәкірт дайындауға ниеттеніп Асқар Тоқпанов ауылында Niyazbeov kures zaly спорт залын ашқан еді.
