Бұл - біздің ортақ жеңісіміз: Нұрқожа Қайпанов әлем чемпионатындағы жеңісінен кейін желіде жазба жариялады
Еркін күрестен Албанияда өткен әлем чемпионатының жеңімпазы атанған Нұрқожа Қайпанов желіде жазба жариялап, қолдау көрсеткен жанкүйерлерге ыстық ықыласын білдірді, деп хабарлайды Sport +.
«Барлығыңызға Ассаламу Алейкум! Маған осы жолда жанкүйер болып, қолдау көрсеткен барлық жанға рақмет. Мен үшін уайымдап әрі менің күшіме сенген әрқайсыңызды бағалаймын. Бұл жеңіс - біздің ортақ жеңісіміз. Әлемдік аренада Қазақстанды көрсете алғаным үшін мақтанамын. Әлем чемпионатындағы жеңісімді өзімнің халқыма арнаймын»– деді Нұрқожа.
Айта кетейік, Нұрқожа әлем чемпионатында бес белдесу өткізіп, барлығын айқын басымдықпен ұтты. Финалда жапон балуанын 6:3 есебімен жеңіп, Қазақстан еркін күрес тарихындағы екінші әлем чемпионы атанды.
