Бүгін Қазақстан-Словения матчы өтеді

13 қазан күні Алматының Орталық стадионында УЕФА Ұлттар Лигасының топтық кезеңі аясында Қазақстан – Словения матчы өтеді, деп хабарлайды Sport Plus Qazaqstan. 

Матч 18:00-де басталады, есіктер 16:00-ден бастап ашылады. Ұйымдастырушылар барынша ерте келгеннің дұрыс болатынын ескертуде. Кассаларда сатылымда билет жоқ.

Өткен турда қос команда да жеңіліске ұшырады, енді жеңіске жету үшін барын салмақ. Станислав Черчесов жаттықтыратын Қазақстан құрамасы әзірше ізденіс үстінде жүргендей. Ұлттар Лигасының үш матчында бір ұпай ғана еншілеп, бірде бір гол соқпаған. Жаңа маусымда сенсация жасап, өз алаңында Норвегиямен (0:0) тең түскен Отандық аяқдопшылар артынша Словенияға (0:3) және Австрияға (0:4) есе жіберді.

Словенияға келер болсақ, Қазақстанды жеңген соң, Австриямен (1:1) тең түсіп, соңғы ойында Норвегияға (0:3) жеңілді. Үш турдан соң топтағы командалар келесі ретпен орналасқан: Норвегия — 7 ұпай, Австрия — ұпай, Словения — 4 ұпай, Қазақстан — 1 ұпай.