«Барыс» «Cочиді» жеңді
«Барыс» Құрлықтық хоккей лигасындағы кезекті ойынын Ресейдің «Cочи» командасына қарсы өткізді, деп хабарлайды Sport+ Kazinform агенттігіне сілтеме жасай отырып.
Кездесуде елордалық команда алғашқы минутта белсенділік көрсетті. Нәтижесінде Әлихан Өмірбеков 14-минутта есеп ашса, Кирилл Савицкий 15-минутта басымдықты арттырды. Ал «Cочи» сапынан Данил Мокрушев 16-минутта есеп айырмасын қысқартса, одан кейін елордалық командадан Никита Сетдиков 24-минутта көздеген нысанадан мүлт кеткен жоқ.
Ресейлік клубтан Данил Авершин 29, Тимур Хафизов 32-минутта қос шайба соғып, таразы басын теңестірген еді. Келесі кезекте елордалық клубтан Кирилл Панюков 36, Антон Бурдасов 50, Кирилл Савицкий 51-минутта үш голдың авторы атанды. Осылайша «Барыс» қарсыласын 6:3 есебімен тізе бүктіріп, турнир кестесіндегі жағдайын жақсарта түсті.
Енді елордалық команда 20 қарашада Ресейдің «Металлург» (Магнитогорск) командасымен кездессе, одан кейін 22 қарашада «Амур» (Хабаровск), 24 қарашада «Аавангард» (Омбы) клубтарымен шеберлік байқасады.
