«Атлетико Мадрид» жеті жылда алғаш рет Кубоктың жартылай финалына шықты
«Атлетико Мадрид» соңғы жеті жылда алғаш рет Испания кубогының жартылай финалына жолдама алды, деп хабарлайды Sport Plus Qazaqstan.
«Атлетико Мадрид» өзінің Метрополитано алаңында «Севильяны» қабылдап, 1:0 есебімен жеңіске жетті. Бұл жеңіс мадридтіктердің жартылай финалға өтуіне мүмкіндік берді.
Командаға жеңісті Мемфис Депайдың екінші таймның 79-минутында соққан голы сыйлады. Бірінші таймның 26-минутында Антуан Гризман пенальтиді жүзеге асыра алмай қалған.
Диего Симеоне шәкірттері 2016/2017 жылғы маусымнан бері турнирдің жартылай финалында ойнамаған. «Атлетико Мадрид» Испания кубогын соңғы рет 2012/2013 жылғы маусымда жеңіп алды.
