Асу Алмабаев Вергарамен жекпе-жек туралы: Уақытынан бұрын жеңбеді деген сұрақ туындамаса, бапкерлердің қойған жоспарын орындадым

UFC-дің қазақстандық жауынгері Асу Алмабаев баспасөз мәслихатында Си Джей Вергарамен жекпе-жек туралы және американ лигасындағы басқа да қарсыластар туралы пікір бөлісті, деп хабарлайды Sport Plus Qazaqstan.  

«Вергарамен жекпе-жек менің көңілімнен шықса да, бапкердің көңілінен шықты ма білмеймін. Үш раунд бойы өзімді жақсы көрсеттім, тек бұл жерде уақытынан бұрын жеңбеді деген сұрақ туындамаса, бапкерлердің қойған жоспарын орындадым. Ал минустар, жетілдіретін жерлер әрдайым болады. Сөзсіз ешкім төбелесіп шықпайды, сол себепті ізденіс үстіндеміз. Ізденіс тоқтап қалса, адамның да дамуы тоқтайды. Үйренетін зат көп әлі».

Сонымен қатар Алмабаев UFC-дегі келесі қарсыласы туралы да айтты.

«Қарсылас ретінде тек қана Джонсонды қарастырмаймын, басқа да жауынгерлерді қарсылас ретінде қабылдауға дайынмен. Егер UFC лигасы кез келген жауынгерді берсе, ұсынысты қабылдаймын. Менің мақсатым – жоғары қарай өрмелеу, жоғарыда тұрған қарсыластарды ұту. Тезірек ТОП-10 және ТОП-5 кіру», - деді Алмабаев.