Astana Qazaqstan Team-нің экс-велошабандозы клубтың спорттық директоры атанады
2025 маусымында «Astana Qazaqstan Team» командасына спорттық директор ретінде үш маман қосылады, деп хабарлайды Sport+.
Жаңа спорттық директорлар құрамында бельгиялық Лоренцо Лапаж, британдық Питер Кенок және италиялық Дарио Катальдо болады. Айта кетсек, Дарио Катальдо 2015-2019 жылдары қазақстандық команда сапында велошабандоз ретінде өнер көрсеткен.
«2025 маусымында спорттық директорлар құрамына өзгерістер енгізілмек. Біз бірден үш жаңа директорды шақырамыз. Лоренцо Лапаж — тәжірибелі әрі жауапты маман, оның жарысты түсінуі жоғары деңгейде, сондай-ақ, ол жарыстан тыс уақытта команда жұмысын үйлестіруші ретінде де шеберлігін көрсете алады. Сонымен қатар, бізге екі жас спорттық директор, Питер Кенок пен Дарио Катальдо қосылады. Екеуі де жақында ғана кәсіби велошабандоздар болғандықтан, қазіргі заманғы велоспортқа жаңа көзқарас әкеледі. Питер Кеноктың спорттық директор ретінде тәжірибесі бар, ал Дарио Катальдо бұл қызметке жаңадан кірісіп отыр. Дегенмен, ол біздің командада бірнеше жыл жұмыс істегендіктен, шабандоздармен қарым-қатынаста өзіндік пайдасын тигізеді. Ол тек «Astana Qazaqstan Team» үшін ғана емес, континенталдық командамыз үшін де құнды маман болады», — деді клубтың бас менеджері Александр Винокуров.
