Зайнутдинов Испанияда емдеу курсынан өтеді

Қазақстан құрамасы мен Түркияның «Бешікташ» клубының жартылай қорғаушысы Бақтиер Зайнутдинов жамбас артқы бөлігінің сіңір жарақатын емдеу үшін Испанияның Ла-Корунья қаласындағы медициналық орталыққа аттанды, деп хабарлайды Sport+ La Voz de Galicia басылымына сілтеме жасап.  

Травматолог Рафаэль Арриасаның айтуынша, ойыншыға ишиалгия диагнозы қойылған — бұл отырған кезде немесе артқы жамбас бұлшықеттері созылғанда (мысалы, жылдам жүгіру кезінде) пайда болатын ауырсыну, ол кең адым жасауға кедергі келтіреді.  

«Зайнутдинов бұл жарақаттан ұзақ уақыттан бері зардап шегіп жүр, ал клуб ұсынған емдеу әдістері нәтиже бермегендіктен, ол алты жыл бұрын ауыр жарақатынан кейін ем алған Ла-Коруньяға қайта оралуды шешті», — деді маман.  

Ағымдағы маусымда Бақтиер Зайнутдинов «Бешікташ» сапында 12 матч өткізіп, 1 нәтижелі пас берді.