Нұрбек Қарабала қазақстандық жауынгерлердің ішінде кімге ашулы болғаны туралы айтты

Naiza лигасының президенті Нұрбек Қарабала Sport Plus Qazaqstan телеарнасында қонақта болып, Еламан Шертаев пен Алиреза Ноэй арасындағы жекпе-жекке баға берді.

«Еламан Шертаев Алиреза Ноэймен жекпе-жектен екі рет бас тартқан болатын. Салмағын қуа алмады, тағыда басқа мәселелер болды. Сол кезде мен Еламанға кішкене ашуланып қалдым. Бірақ ол – патриот жауынгер, осы қасиеті маған ұнайды. Басқа лигаға шақырса да, «ағай, мен сіздің лигада төбелесе берейнші» деп жауап қайтарады. Еламан маған жекпе-жек беріңізші, мен дәлелдеймін деп күнде жазатын болатын. Мен оған егер сен біз берген мықты қарсыласты жеңсен, әрі қарай тағы сөйлесеміз дедім. 70% жауынгерлер шешінетін бөлмеден октогонға дейін жолда жанып кетеді, мен соны бақылауды жақсы көремін. Жекпе-жек алдында Еламанның көзі жанып тұрды, бұл істі сағынғаны көрініп тұрды. Мен оған сол уақытта риза болдым, аталмыш жұдырықтасуды қызыға қарадым. Негізі, Naiza 57-нің апсеті (апсет-бұл аутсайдер фаворитті жеңген кездегі күтпеген нәтиже - автор) сол Шертаев пен Алиреза арасындағы жекпе-жек болды, себебі Еламан жеңеді деп ешкім сеңген жоқ», - деді Қарабала.