Нұрбек Қарабала Әліби Ідірістің UFC-дегі мүмкіндіктері жайлы: Әліби – мінезді, тәжірибелі файтер

NAIZA президенті Нұрбек Қарабала Әліби Ідірістің UFC-дегі болашағы туралы пікір білдірді, деп хабарлайды Sport+ Sports24.kz сайтына сілтеме жасап.  

«Бұл — Әліби үшін үлкен мүмкіндік. Бұрынғы сұхбаттарымда осындай спортшылар үшін UFC-ге TUF арқылы өткен дұрыс екенін айтқанмын. 12 серия бойы ұйым жекпе-жекке дайындық пен спортшылар арасындағы қарым-қатынасты көрсетеді. UFC бұл шоуды жоғары бағалайды, өйткені экономикалық дағдарыс кезінде TUF олардың қаржылық жағдайын көтеруге көмектесті. Сондай-ақ, онда Кормье сияқты бапкерлер бар, олар өз тәжірибесімен бөліседі», — деді Карабала.  

Функционердің айтуынша, егер Ідіріс UFC-де өнер көрсетсе, 8-9 орындарда болар еді.  

«Ол өте тәжірибелі әрі мінезді файтер. Әліби UFC-ге өте алады деп есептеймін. Бірақ ол TUF арқылы өте ме? Мұны нақты айта алмаймын, нәтижесін 27 мамырда көресіздер», — деп қосты Қарабала.  

Айта кетейік, қазақстандық MMA файтері Әліби Ідіріс (10-0) The Ultimate Fighter (TUF) реалити-шоуының 33-маусымына қатысты. 30 жастағы ақтөбелік спортшы жергілікті «Еркін Күш» клубының намысын қорғайды. Ол кәсіби мансабындағы 10 жекпе-жегін де NAIZA лигасында өткізіп, 2021-2022 жылдары чемпион атанған.