Мұратбек Қасымбай UFC-мен келісімшарты туралы мәлімдеме жасады
Аралас жекпе-жек шебері Мұратбек Қасымбай UFC промоушенімен келіссөздер қалай жүргізіліп жатқанын айтты, деп хабарлайды Sport Plus Qazaqstan.
Біз қазір келіссөздер жүргізіп жатырмыз. Ол UFC-мен келісімшартқа отырдық дегенді білдірмейді. Әзірге келіссөз ғана, сөйлесіп жатырмыз, - деді Мұратбек Қасымбай.
Қазақстандық файтер соңғы жекпе-жегін 2023 жылдың желтоқсанында «Наше дело 81» турнирінде өткізді. Ол Ресей өкілі Александр Грозинмен кездескен болатын. Бұл бәсекеде Грозин төрешілердің шешімімен басым түсіп, кәсіби мансабындағы 24-жеңісіне қол жеткізді. Ал Мұратбек 5-рет жеңіліске ұшырады. Оның активінде 12 жеңіс бар.
Айта кетейік, қазіргі таңда UFC-де қазақстандық 6 файтер өнер көрсетеді. Олар: Шавкат Рахмонов, Асу Алмабаев, Бекзат Алмахан, Азат Максұм, Сергей Морозов және Мария Агапова.
