Бейбарыс Оразов: Қарсыласымның менен үлкен екенін түсіндім, бірақ шегінбедім

«Барыс» командасының қорғаушысы Бейбарыс Оразов КХЛ-дегі алғашқы шайбасын соғып, «Сібірден» жеңіліс тапқан ойын жайлы Sport+ телеарнасына сұхбат берді.

— Бейбарыс, бұл қиын сырт алаңдағы үшінші ойын болды. Оған қандай күйде, қандай көңіл-күймен шықтыңдар?

— Уақыт айырмашылығына байланысты сәл қиын болды. Бірақ бәріміз кәсіби ойыншымыз, қалпына келуге дұрыс көңіл бөлдік. Сондықтан көңіл-күйде мәселе болған жоқ, барлығымыз мұз айдынына шығып, күрестік. Бірақ тағы да мүмкіндіктерді жүзеге асыруда қиындықтарға тап болдық.

— Владивосток пен Хабаровскідегі ойындардан айырмашылығы, бүгін «Барыс» ойынды жақсы бастады.

— Бапкерлер штабы бізге тез әрі қажетсіз голдарды өткізіп алып, кейін ойынға кіру қиын болатынын айтты. Бүгін дұрыс бастау керек еді, басында жақсы шықтық. Гол соғып, есепте алға шықтық, бірақ кейін қателіктер жібере бастадық.

— Кейін сенің қатысуыңмен төбелес болды. Сол эпизодта не болғанын айтып берсең.

— Никита Сетдиковқа қарсы қатты күштік әдіс қолданды. Мен оны қорғауға бардым, бір ойыншыны итеріп қалдым, ол менімен төбелесуге бел буды. Бір жағынан, оның менен үлкенірек, тәжірибелі әрі бойшаң екенін түсіндім, бірақ шегінбедім. Мінезімді көрсете алдым.

— Екінші кезеңнің соңында сенің голың соғылды. Бұл маусымда КХЛ-дегі алғашқы шайбаңды соғу сен үшін қаншалықты маңызды болды?

— Ең алдымен, бұл голды отбасым мен жақындарыма арнаймын. Иә, маусым аяқталғанша гол соғу маңызды болды, жақсы мүмкіндіктерім де жеткілікті болды. Мүмкін, бұл маған бір жағынан қысым көрсеткен де шығар, бірақ командаластарым үнемі қолдау көрсетіп, сәті түсетінін айтты. Негізі, бұл шабуылда басқаша ойнауымыз керек еді. Бірақ қақпашының алдында ойыншылардың көп шоғырланғанын көріп, соққы жасадым. Шайба қарсыласқа тиіп, тоғыздыққа ұшты. Бүгін Горди Хоудың хет-тригіне сәл жетпей қалды (күлді).

— Жалпы, сен ойын уақытының жеткілікті мөлшерін алып жүрсің. Маусым соңына қарай жаңа деңгейге үйрене алдың ба?

— Әрине, қазір үйрендім деуге болады. Алғашында өте қиын болды, жылдамдыққа ілесе алмай жүрдім. Бірақ қазір 40-тан астам матч өткіздім. Ойлау қабілетім де тезірек жұмыс істей бастады, шайбаны да жылдам қозғалтамын. Жақсы тәжірибе жинадым.

— Клубта жергілікті жас ойыншыларға басымдық берілетіні ашық айтылып жүр. Осындай жауапкершілікті көтеруге дайынсыз деп ойлайсың ба? Ал көшбасшы болу үшін маусымаралық кезеңде қандай бағытта жұмыс істеу керек?

— Бұл барлық жас ойыншыға бірдей берілмейді. Бізге осындай деңгейде өзімізді көрсетуге үлкен мүмкіндік берілді, және меніңше, жаман болмады. Көпшілігіміз КХЛ-дегі алғашқы шайбаларымызды соғып үлгердік. Ең алдымен, физикалық дайындықты күшейту керек деп ойлаймын, физикалық жаттығуларға баса назар аудару қажет. Балалардың көбісінде ойын оқу қабілеті мен соққылар бар. Бірақ физикалық тұрғыдан, жеке күресте әлі де қиындықтарымыз бар. Күшімізді арттырсақ, ойнау да жеңілдейді.