2026 жылғы Әлем чемпионаты қатысушыларының тартысы. Эквадор – Аргентина матчын қайдан және қашан көруге болады
2026 жылғы Әлем чемпионатының іріктеу кезеңінде Эквадор мен Аргентина құрамалары өзара кездеседі. Екі команда да мундиальға жолдама алып қойған: Скалони шәкірттері бірінші орыннан, ал эквадорлықтар төртінші орынға түсуі мүмкін болса да, одан төмендемейді.
Бұл іріктеу барысында Аргентина Буэнос-Айресте болашақ қарсыласын 1:0 есебімен жеңді, жалғыз голдың авторы Лионель Месси болды. Кейін командалар 2024 жылы тағы екі рет кездесті: жолдастық ойында дәл сондай есеп тіркеліп, Анхель Ди Мария гол соқты.
Ал Америка Кубогының ширек финалында аргентиналықтарға оңай соққан жоқ – негізгі уақыт 1:1 есебімен аяқталды. Лисандро Мартинестің голына эквадорлық Кевин Родригес жауап берді. Пенальти сериясында Аргентина 4:2 есебімен жеңіске жетті.
Олардың жаңа кездесуі 10 қыркүйек күні таңертең өтеді. Ойын 04:00-де басталады. Тікелей эфирді Sport+ телеарнасынан және sportplustv.kz сайтынан тамашалауға болады.
