Ролан Гаррос турнирі: АҚШ чемпионын ұтқан Путинцева екінші айналымға өтті

Қазақстанның екінші, әлемнің 39-ракеткасы Юлия Путинцева Ролан Гаррос турнирінің екінші айналымына өтті, деп хабарлайды Sport Plus Qazaqstan.

Қазақстандық теннисші алғашқы кездесуін рейтингіде өзінен төрт саты жоғары тұрған америкалық, 2017 жылғы АҚШ чемпионы Слоан Стивенспен өткізді.

Осыған дейін қарсыластар өзара жеті рет кездесіп, соның төртеуінде Путинцева жеңген еді. Бірақ өткен жылы Франция ашық чемпионатының үшінші айналымында Стивенс ұтқан-ды.

Бұл жолы Юлия айқын басымдылық танытты - 6:1, 6:2. Бір сағатқа жетпейтін уақыт ішінде ол 4 брейк-пойнттан шашау шығарған жоқ.

Юлия Путинцева үшінші айналымға өту үшін әлемнің 28-ракеткасы, ұлыбританиялық Кэти Бултер немесе рейтингіде 139-сатыдағы испаниялық Паула Бадосаның қай жеңгенімен таласады.