Робин ван Перси өзінің туған командасында бас бапкер ретінде дебют жасайды. «Фейеноорд» — «НЕК Неймеген» матчының тікелей эфирі

Эредивизионның 24-тур матчында турнир кестесінде үшінші орында тұрған «Фейеноорд» өз алаңы – «Де Куйп» стадионында чемпионаттың ортаңғы бөлігінде орналасқан «НЕК Неймегенді» қабылдайды, деп хабарлайды Sport+.  

Бұл кездесу «Фейеноорд» академиясының түлегі және Нидерланд құрамасының тарихындағы ең үздік сұрмерген Робин ван Перси үшін ерекше болмақ. Ол алты күн бұрын клубтың бас бапкері болып тағайындалды.  

Қазіргі таңда «Фейеноорд» Нидерланд чемпионатының турнир кестесінде үшінші орында тұр, көшбасшы «Аякстан» 14 ұпайға артта қалып келеді.  

Олардың алдағы қарсыласы – «Неймеген» 12-орында. Соңғы алты ойында команда екі рет жеңіске жетіп, екі рет жеңіліске ұшырады және екі рет тең түсті. Оның ішінде өз алаңында ПСВ-мен 3:3 есебімен жанкешті ойын өткізген.  

Айта кетейік, маусымның бірінші айналымында бұл екі команда 1:1 есебімен тең ойнаған болатын.  

Робин ван Персидің «Фейеноорд» тізгініндегі дебюттік матчын тікелей эфирде Sport+ Qazaqstan телеарнасынан, сондай-ақ Sportplustv.kz сайтынан тамашалай аласыз.