Паралимпиадашылар жиырма екінші лицензиясын иеленді

Еліміздің спортшысы Салтанат Әбілхасымқызы пара жеңіл атлетикадан Париж-2024 Паралимпиада ойындарына лицензия алды, деп хабарлайды Sport Plus Qazaqstan.

Дене мүмкіндіктері шектеулі тұлғаларға арналған спорттық даярлау орталығы баспасөз қызметінің мәліметінше, Салтанат Т35 классында 100 м жүгіру дисциплинасында өнер көрсетеді.

Бұл осымен пара жеңіл атлетикадан Қазақстанның төртінші лицензиясы. Бұдан бөлек, Паралимпиада ойындарында аталған спорттан ел намысын Дастан Мұқашбеков, Жоламан Еламан және Қайыржанова Гүлбахыт қорғайды.

Қазіргі уақытта Қазақстанның Паралимпиада ойындарында спорттың 8 түрінен 22 лицензия бар. Олардың ішінде: пара пауэрлифтинг (5), пара жеңіл атлетика (4), пара жүзу (4), волейболды отырып ойнау (1), пара үстел теннисі (1), пара таеквондо (3), пара каноэ (2) және пара оқ ату (2).

XVII жазғы Париж-2024 Паралимпиада ойындары 28 тамыз бен 8 қыркүйек аралығында өтеді. Жарыста 23 спорт түрінен 549 медаль жиынтығы сарапқа салынады.