Оралдың «Ақжайығы» «Локомотивті» жеңді

Допты хоккейден жоғары лига командалары арасында бүкілресейлік жарыста Оралдың «Ақжайығы» жаңа жылдағы алғашқы кездесуін Орынборда жергілікті «Локомотивпен» өткізді, деп хабарлайды Sport+ Kazinform сайтына сілтеме жасай отырып.

Осыған дейін оралдықтар 21 ұпаймен екінші топта үшінші орында тұрған еді. Бірінші таймда «Ақжайық» 7:3 есебімен алға кетті. Екінші кезеңде Николай Шавалдиннің шәкірттері есепті 18:5-ке жеткізді.

Батысқазақстандық клубтан ресейлік сұрмерген Максим Пахомов 7 голдың авторы атанса, команда капитаны Максим Өтебалиев те қалысқан жоқ. Оның еншісінде 5 доп бар. Сондай-ақ «Локомотив» қақпасына Рауан Исалиев 3, Дәурен Оралов, Артем Лапшин және Нұрбол Бөкешов бір-бірден доп енгізді.