Нариман Құрбановқа тағы бір пәтер сыйға тартылды

Олимпиада жүлдегері Нариман Құрбановқа демеушілер екі бөлмелі пәтер сыйлады, деп хабарлайды Sport Plus Qazaqstan

Алматы қаласының Билалдин Ушуров бастаған кәсіпкерлері Парижде өткен Олимпиада ойындарының күміс жүлдегері Нариман Құрбановқа 2 бөлмелі пәтерге сертификат табыстады.  

«Ең алдымен, меценаттарымызға, бизнесмен ағаларымызға маған екі бөлмелі пәтер сыйлаған үшін алғысымды білдіргім келеді. Шындығында, мен мұндай сыйлық аламын деп күткен жоқпын. Бұл үлкен бақыт, мен  үшін бұл менің жаңа өмір жолыма үлкен көмек болады. 

Менің тарихи жеңісім үшін мұндай сыйлық маған әрі қарай  көп жаттығуға мотивация береді. Мен алдағы төрт жылда алтын медаль алу үшін бар күшімді саламын», — деді Нариман Құрбанов.

Еске сала кетсек, бұған дейін Құрбановқа Алматы қаласы әкімдігінен пәтер, ақшалай сыйақы және автокөлік берілді, сонымен қатар белгілі авто дүкеннен тағы бір көлік табысталған еді.