Юлия Путинцева Париждегі Олимпиада ойындарына қатыса алмайды

Юлия Путинцева украиналық Марта Костюкпен бастапқы ойын алдында медициналық тексеруден кейін матчтан бас тартты, деп хабарлайды Sport Plus Qazaqstan.
 
Еске салсақ, Уимблдонда әлемнің бірінші ракеткасы Ига Швентекті жеңгеннен кейін Юлия тізесінің ауырғанына шағымданған болатын. Соған қарамастан, ол Олимпиадаға мақсатты түрде дайындалып, барлық қалыпқа келу шараларынан өтті.  

Қазақстан теннис федерациясының вице-президенті Диас Досқараев жағдайды түсіндірді:

«Париж Олимпиадасы біз үшін нағыз сынақпен басталды. Бұрнағы күні Елена Рыбакина денсаулығына байланысты жарыстан шет қалды, бүгін біздің командада жарақатына орай Юлия Путинцева қатардан шықты. Біз оларға үлкен үміт артқан едік, өте қапалымыз. Елена мен Юлия да Олимпиадада ойнау мүмкіндігінен айырылғанына өкінеді. Біз жанкүйерлерді осындай күрделі кезеңде барлық ойыншыларымызды қолдауға шақырамыз. Қиындықтарға қарамастан, біз алға шығып, еліміздің жалауы астында жаңа жеңістерге ұмтылатын боламыз».