Демеу Жадыраев: Финалда жолығатын жапондық балуанмен бұрын кездесіп, жеңілген едім

Грек-рим күресінен Париж Олимпиадасының финалына шыққан Демеу Жадыраев Olympic.kz сайтына шағын сұхбат беріп, бүгінгі жекпе-жектерін қорытындылады, деп хабарлайды Sport Plus Qazaqstan.

«Олимпиада ойындары болғандықтан, ешбір белдесу оңай болған жоқ. Ешкімді бөліп-жармаймын. Төрткүл дүние көз тіккен жарыс, сондықтан жауапкершілік жүгі ауыр. 

Әлі де босаңсуға болмайды. Ертең финалда жолығатын жапондық балуанмен бұрын кездесіп, жеңілген едім. 

Ал жартылай финалдағы әзербайжандық спортшымен оқу-жаттығу жиындарында күресіп жүрміз. Осы белдесуде бас бапкер Юрий Мельниченконың қойған тактикасымен күрестім. Бәрі ойдағыдай шықты. 

Қолдауларыңызға рахмет. Енді финалды күтеміз», - деді Жадыраев.