Чепиондар лигасы: «Бавария» мен «Реал Мадрид» тең түсті

Футболдан UEFA Чемпиондар лигасының жартылай финалындағы алғашқы ойын нәтижесі белгілі болды, деп хабарлайды Sport Plus Qazaqstan.

Бұл кездесуде «Бавария» (Германия) мен «Реал Мадрид» (Испания) командалары шеберлік байқасты.

Алғашқы минуттан германиялық команда тізгінді өз қолын алуға тырысты. Қос қанаттан алма-кезек шабуыл ұйымдастырды. Оған испаниялық команда қорғаушылары тойтарыс беріп жатты. Ендігі бір сәтте «Бавария» футболшылары көздеген нысанадан мүлт кетті.

Есесіне олар өз қақпасына гол жіберіп алды. Ойынның 24-минутында «Реал Мадрид» шабуылшысы Винисиус Жуниор өз мүмкіндігін құр жіберген жоқ. Осылайша испаниялық команда алға шығып, ойын барысы шиеленісе түсті.

Екінші кезеңді «Бавария» белсенді бастады. Нәтижесінде Лерой Сане 53-минутта таразы басын теңестірсе, Гарри Кейн 57-минутта пенальтиден мүлт кеткен жоқ.

Ал 83-минутта «Бавария» қақпасына белгіленген пенальтиді Винисиус Жуниор шебер орындады.

Осылайша командалар 2:2 есебіне қанағат білдіріп тарасты.

Екі команда арасындағы қарымта кездесу 8 мамырға белгіленген.