Азия Кубогы: Қырғызстан-Оман шешуші ойыны бүгін
25 қаңтар күні Катардағы Азия Кубогында топтық кезеңнің соңғы туры аясында ойындар жалғасады. F тобында плей-офф жолдамасын қамтамасыз ете алатын үшінші орын үшін Қырғызстан мен Оман командалары кездеседі, деп хабарлайды Sport Plus Qazaqstan.
Қос құрама да топта бір рет Сауд Арабиясына жеңілген. Оман кестеде қарсыласынан жоғары тұр, өйткені Таиландпен ойында тең түскен еді. Ал, қырғыздар жеңіліс тапқан (0:2).
Қырғызстанды ірі есеппен жеңген жағдайда Оман екінші орынға да көтерілуі мүмкін. Бірақ ол үшін Саудия Таиландтан үлкен есеп айырмашылығымен басым түсуі тиіс.
Қырғызстанның соққан голы мен ұпайы жоқ болса да, келесі кезеңге өту мүмкіндігін жоғалтқан жоқ. 2-3 немесе одан көп доп айырмашылығы топтық кезең нәтижесінде үшінші орын алған төрттікке енгізуі әбден мүмкін. Қырғызстан-Оман матчы Астана уақытымен сағат 21:00де басталады. Ойынды тікелей эфирде Sport Plus Qazaqstan телеарнасының сайтынан тамашалай аласыздар.
Телеарна эфирінде дәл осы уақытта Сауд Арабиясы мен Таиланд матчы көрсетіледі.
Азия Кубогындағы бүгінгі ойындар 17:30да басталады. Е тобында Оңтүстік Корея мен Малайзия кездеседі. Бұл матчты да Sport Plus Qazaqstan телеарнасы мен сайттан көре аласыздар.
