Азия чемпионаты: екінші күні боз кілемге кімдер шығады
Алғашқы жарыс күні Отандық грек-рим күресінің балуандары үш жүлде иеленді: Сыздықовтың күмісі, Магомадов пен Ожаевтың қола медалі.
26 наурыз күні тағы бес «классик» боз кілемге шығады.
60 келіде 22-жасар Бақытжан Қабдыл іріктеу айналымында жапон Каито Инабамен белдеседі. Қабдыл былтыр 23 жасқа дейінгі балуандар арасындағы Азия чемпионатында бесінші орынды қанағат тұтқан еді.
67 келіде Қазақстан намысын 2022 жылғы Азия чемпионы Мейіржан Шермаханбет қорғайды. 28-жасар спортшының қарсыласы — кореялық Минсен Квон.
72 келіде Әділхан Сатаев Ерыскелды Хамзаевпен (Қырғызстан) күш байқасады.
82 келіде Омар Сатаев бірден ширек финалдан бастайды. Оның қарсыласы — Босен Кан (Корея). 23-жасар қазақстандық балуан 2022 жылы U20 санатында қола медаль иеленген еді.
2024 жылғы Қазақстан Кубогының жеңімпазы Ильяс Гучигов 97 келі ширек финалында Нитеш Нитешпен (Үндістан) белдеседі.
Алғашқы айналым Қазақстан уақытымен 13:30да басталады.
Азия чемпионатын тікелей эфирде Sport+ телеарнасынан және sportplustv.kz сайтынан тамашалай аласыздар.
