Асу Алмабаев UFC чемпиондық атағына бұрын үміткер болған қарсыласпен жекпе-жекке шығады

Қазақстандық жауынгер Асу Алмабаев пен америкалық Алекс Перестің жекпе-жегі туралы DAR Team командасы әлеуметтік желілерде жариялады, деп хабарлайды Sport+.

Асу мен Перес 22 қараша күні Дохада өтетін UFC Fight Night турнирінде кездеседі. Бұл UFC-дің Катардағы алғашқы турнирі болмақ.

Жақында Перес Алмабаевқа ашық түрде жекпе-жекке шығуға шақырған еді. 33 жастағы америкалық спортшы 2017 жылдан бері UFC-де өнер көрсетіп келеді: қазіргі рекорды — 7 жеңіс, 5 жеңіліс. 2020 жылдың қарашасында Алекс үш жеңістен кейін чемпиондық атақ үшін айқасып, бірінші раундта Давесон Фигейредоға гильотина әдісімен жеңілген.

Кейінгі екі жекпе-жегінде Перес болашақ чемпион Алешандре Пантожа мен Мұхаммед Мокаевпен кездесіп, екеуінде де жеңіліп қалды.