Әмір Омарханов жұптық сында да жеңді

Әмір Омарханов Аустралияның ашық чемпионатында жұптық сында да сәтті өнер көрсетуде. Қазақстандық теннисші Оңтүстік Корея өкілі Чанджун Киммен бірге екінші айналымға өтті, деп хабарлайды Sport Plus Qazaqstan.

Алғашқы кездесуде олар Изан Валентине (Испания)/Тейс Богард (Нидерланды) тандемін 6:3, 7:5 есебімен жеңді.

Омарханов пен Ким бір-бірін жақсы таниды. Ең қызығы екі ойыншы Juniors Australian Open жеке сынында да ширек финалдық жолдама үшін өзара таласқалы тұр. Әзірше жеке кездесулерде жалпы есеп Әмірдің пайдасына 1:0. Әмір 2023 жылдың қазан айында Ванджудегі (Оңтүстік Корея) турнирде  6:7(2), 7:6(3), 6:3 есебімен басым түскен.

Сонымен қатар, аталмыш турнирде қазақстандық Асылжан Арыстанбекова белорус Юлия Перепихинамен бірге корт иелері Рени Алэйм және Алана Сибасичті 6:1, 6:3 жеңіп, екінші айналымға өтті.