Әмір Омарханов Australian Open үшінші айналымында!

Әмір Омарханов жастар арасындағы Australian Open турнирінің үшінші айналымына шықты, деп хабарлайды Қазақстан теннис федерациясы.

Екінші айналымда қазақстандық теннисші британдық Виктор Фридрихты 3:6, 7:6 (6), 6:3 есебімен жеңді. Шешуші сетте 0:2 көрсеткішімен жеңіліп жатқан Әмір қайсарлық танытып, басымдық көрсетті.

Қарағанды теннис мектебінің түлегі келесі кезеңде Оңтүстік Кореялық Хен Киммен жолығады.

Турнирдің алғашқы ойынында Әмір жарыстың бірінші нөмірлі ойыншысы итальялық Федерико Чинодан айласын асырды. Есеп 0:6, 6:3, 6:3.

Әмір Омарханов әлемдік жастар рейтингінде  26 орында. Қарағандыда Петр Нестеровтың қол астында жаттыққан ол қазіргі уақытта Белградтағы Янко Типсаревичтың академиясында Неманья Лаличтің жетекшілігімен дайындалуда.