Жазира Орақбаева 2024 жылғы Азия чемпионатының жартылай финалына шықты

Қазақстан құрамасының боксшысы, Азия чемпионатының 2022 жылғы қола жүлдегері Жазира Орақбаева Тайбэйлік Луо Ю-Тиньді бірінші раундта нокаутқа түсіріп, Азия чемпионатының жартылай финалына жолдама алды, деп хабарлайды Sport+.

52 келі салмақ дәрежесінде сынға түскен қазақстандық спортшы ширек финалдық жекпе-жегінде қарсыласын екі рет нокдаунға жіберіп, рефери жекпе-жекті тоқтатты. Осылайша, Орақбаева сенімді жеңіске қол жеткізді.

Естеріңізге сала кетейік, бұған дейін әйелдер құрамасы екі жеңіліске ұшыраған болатын: Алуа Балқыбекова (50 келі) сырқатына байланысты жарыстан шығып қалса, Сымбат Әлиасқар (54 келі) ширек финалда жеңіліс тапты.

Қазіргі уақытта Қазақстан құрамасында 12 жартылай финалист пен бір финалист бар.